Počnite da volite sebe!
Vi ste sebi najveći pokretač i inspiracija!
Privukla me ova tema vjerovatno zato što cijenim da vam moja iskustva i savjeti mogu možda biti korisni, a tema ljubavi prema sebi je zaista nepresušan izvor. Zdrava ljubav prema sebi neophodna je za napredak na svim životnim poljima. Kada počnemo cijeniti i prihvatati sebe onda se i naše okruženje počinje mijenjati i ponašati drugačije prema nama.
Neki od vas će pomisliti i izgovoriti… “Ma, da.. ali voljeti sebe je sebično“ ili “Naravno da volim sebe samo je jako teško naći vrijeme koje ću posvetiti samo sebi”. Sigurno vam je još pregršt misli palo na pamet.
Iskreno, iako danas sa vama dijelim ovaj tekst, moram priznati da sam i ja tek poslednjih par godina počela voljeti sebe. Mnoga životna razočarenja, nesigurnosti, nedostatak samopouzdanja i slično, nikako nisu vodili ka tom mom cilju da zavolim sebe. Nijesam imala dovoljno strpljenja, a i željela sam brzo rješenje. Po mogućnosti, najzgodnije mi je bilo da mi ga neko drugi osmisli, kako bih izbjegla da sama bolje upoznajem sebe i mijenjam se. Napravila bih tri koraka naprijed, a onda nazad dva, zbog čega sam se često osjećala umorno i izgubljeno.
Iako sam na sebe gledala kroz dosta negativnu prizmu, drugi, čak i meni bliski ljudi su imali potpuno drugačiju sliku. Samouvjerena, uporna, jaka žena koja može sve. Ma, žena zmaj! To su bile njihove riječi kada bi me opisivali. Kao što i sami znate, nerijetko se desi da drugi u nama vide ono čega mi nekad nijesmo ni svjesni. Na tome im hvala, jer nas na taj način negdje i dodatno ohrabruju. Edukacija da budem kouč, pored svih ostalih tehnika i alata koje sam koristila, su mi zaista mnogo pomogli.
Ako može ona mogu i ja. Pitanje je „kako“?
Kada bi vas neko pitao da nabrojite 3 do 5 stvari koje smatrate pozitivnim kod vas vjerovatno biste u trenutku zastali. A, da vas neko pita da nabrojite 3 do 5 negativnih stvari, mana, sigurno biste ih u tren oka izgovorili. Zanimljivo, zar ne?
Nažalost, postoji i velika vjerovatnoća, da oko sebe imate ljude koji ističu samo vaše manje pozitivne osobine. Takve ljude počnite izbjegavati. Oni će, polako, kako vi budete više voljeli i poštovali sebe, radili na prepoznavanju svojih pozitivnih osobina, sami nestajati iz vašeg okruženja i života. A vi ćete početi da volite svoje mane, da radite na njima i usavršavate se, jer zaboga, niko nije savršen.
Ima mnogo tehnika koje možete odabrati da vam pomognu. Podijeliću sa vama šta sam ja radila.
Prva faza. Kupite svesku. Neka bude sa mnogo svijetlih boja, vesela. Neka bude pozitivna!
Svaki dan u toj vašoj svesci zapisujte minimum 3 do 5 svojih pozitivnih osobina. Možete zapisivati i neke lijepe, vedre situacije koje ste doživjeli ili dobre stvari koje ste uraditi toga dana za vašu djecu, roditelje, prijatelja, kolegu…potpuno je svejedno. Bitno je da budu pozitivne! Možete pisati uveče ili ujutru, kada je za vas najbolje. Ako neki dan preskočite, obavezno nadoknadite sledećeg dana. Takođe, ako se desi da nijeste sigurni šta bi napisali, upitajte dragog prijatelja da vam priskoči u pomoć.
Zapamtite, mora da bude lijepo i pozitivno! Poenta je da, kada listate te stranice, osmijeh zablista na vašem licu! Suština je da shvatite da zaista vrijedite!
Upravo tada počinje druga faza. Sada nastavljate da pišete o zahvalnosti i na čemu ste zahvalni u tom danu. To mogu biti i sitnice, i velike stvari. Možda ste zahvalni što je bio sunčan dan, što vam je kolega spremio kafu u pravom trenutnu, što ste odmah dobili taksi, kupili omiljeno voće na putu do kuće. Što ste zdravi, imate dom, prijatelje. Postoji toliko stvari na kojima čovjek treba biti zahvalan. Ako se desilo i nešto loše, slobodno zapišite i to. Budite sigurni da kada se nakon određenog vremenskog perioda vratite na taj događaj, doći ćete do zaključka da je taj, naizged loš događaj, ustvari vama donio dobro. Budite i na tome zahvalni. Ništa se ne dešava slučajno.
Vremenom ćete osjetiti da ste poletniji, hrabriji, samouvjereni. Cijenite svaki trenutak i uvijek znajte da kada ste zadovoljni samim sobom, drugima od toga može biti samo bolje.
Vjerujte sebi. Vjerujte u sebe.
Ljubav prema sebi nije luksuz, ljubav prema sebi je potreba.
